Fasnacht vo hüür
Zuekunfts-Visione (those where the days)
Dass d’Merkel Angela i zwänzigig Johre,
zwänzg Johr autet do bruchsch ke Profet.
- Doch mir bhoupte hüt scho unverfrore
denn isch si so aut wie sie hüt usgseht.
I zwöi drü Johr dir wärdets üs nid gloube,
gitt’s s’Tagblatt wieder jo das isch e Hitt.
Ou nei mir gseh’s jetzt grad i euchne Ouge,
heit gar nid gmerkt das s’Tagblatt nümme gitt.
öpp dört vüu Schlaus drinn steit,
öpps mou im Summer schneit,
was i de Stärne obe aues stoht.
Mir läse us der Hang,
us jedem Gägestang.
wie’s üs ir Zuekunft aune so ergoht.
Im Büechibärg dört si döu nid ganz gschüttlet,
Nennigkofer mir heis euch de gseit.
Wird dört die nöchschte 30 Johr wyter blüttlet,
de jede zwöit der Name Widmer treit.
Ou der Fluri Kurt chas nid vermiide,
früecher oder spöter das isch klar.
Wird’er ha es chliises Ouge-Liide,
är isch jo jetzt scho üse Graui-Star
öpp dä mou rosa dreit,
öpps mou im Summer schneit,
was i de Stärne obe aues stoht.
Mir läse us der Hang,
us jedem Gägestang,
wie’s üs ir Zuekunft aune so ergoht.
I üsem Städtli do herrscht Beizestärbe,
doch nid mou das verursacht üse Fruscht.
Was üsi Luune würklech duet verdärbe,
es stärbe aui nume nid der Ruscht.
Wäge üsne neue Usgangszyte,
füehle mir üs würklech nid betroffe.
Mir göh de statt vöu z’chäre statt vöu z’striite,
- is Schöngrüen dört isch die ganz Zyt offe.
öpp dört e Wärter steit,
öpps mou im Summer schneit,
was i de Stärne obe aues stoht.
Mir läse us der Hang,
us jedem Gägestang,
wie’s üs ir Zuekunft aune so ergoht.
Leider müesse mir euch informiere,
dass s’Gränche ou i 10 Johr gäng no gitt.
Mir chöi zwar nid so schlächt prognostiziere,
doch ändre chöi mer Zuekunft leider nid.
Am Fasnachts-Samschtig weiss der Fasnachtsgänger,
gitt’s Schnitzubänk em masse im Wängistei.
nöchscht Johr s’erscht mou mit de Hüslisänger,
denn die zwe si bis denne dört dehei.
öpp me die zwe versteit,
öpps mou im Summer schneit,
was i de Stärne obe aues stoht.
Mir stosse jetze a,
chöi mir chli Wysse ha.
die Rundi näh mer jetze grad uf’s Huus.
La la la la-la-la………