Fasnacht vo früener

Bir Expo, jo mir wüsses haut
Do fäut's ar Zyt und au am Gäut

Die Arteplasche, die sy z'tüür
Drum sy vo Honolulu hüür

Mir haut jetz mou i'd Presche gschprunge
Drum hei mir jetze zäme g'funge

Dass so n'es Aareschtäg-Projekt
Konzeptionell haut scho verreckt

Guet würd id Expo inepasse
Aber dr Schtraume dä tuet passe

Mir hei's probiert - s'isch nüt drus worde
Es plooge d'Herre angri Sorge

Me bout ne nid me bout ne doch (aha)
Me bout ne nid me bout ne doch

Röfräng:
Aareschtäg

En Aareschtäg das wär z'probiere
chönnt au dr Egli profitiere

Und Beizer chönnte wider lache
um d'Aare n'ume Umsatz mache

Kem Mönsch wäri dä Platz verwehrt
Für Gränchner säubverschtändlech gschpeert

Bir Expo hei mer se'n'ertappet
S'het nid bim erschte n'Aalauf klappet

Im grundgno chäms doch nur drufaa
Was a dr Schpitze für n'e Maa

Oder e Frau würd dominiere
Dass das Projekt chönnt reüssiere

Me bout ne nid me bout ne doch (aha)
Me bout ne nid me bout ne doch

Röfräng:
Aareschtäg

Dr Büttiker würd's Büdsche spränge
Macht Überzyt bim Schänkle länge

Dr Fluri Kurt würd lieber warte
Schnäui Entscheid sy nid si Schparte

Von Dänike bruucht ke Milione
E n'Aareschtäg - nur mit Visione

Für Jet-Set und chli Glanz um d'Auge
Würd Borer und Miss Texas tauge

Zum suufe näh mer nid Rivella
Atrium Wasser vor Uriella

Dr Blocher chönnt das Amt beschtrytte
Är bout dr Schtäg ar rächte Syte

Del Ponte zrugg, das wär e Gägg
Derbi isch si jo ändlech wäg

Dr Ebner bout ne wyter unge
Grad uf dr Höchi vo Fäudbrunne

Me bout ne nid me bout ne doch (aha)
Me bout ne nid me bout ne doch

Röfräng:
Aareschtäg

Dr Peter Müller hätt e Mannschaft
Für Ihn nur Manne und ke Frau schafft

Der roti Röbu wär e Flotte
Mit oder ohni dr Grawatte

Dr Piccard - dä müesst do i'd Hose
Dä het scho mängs Projekt uuf'bloose

Oder dr Rey - dä wär no besser
Bout no di schönere Luftschlösser

Wie wär's mit eim vor Vigier-Sippe
Dä würd Zemänt i d'Aare kippe

Connections hätt au dr Bellasi
Do müesst doch Gäut vor Stasi z'ha sy

Wie wär's mir nähmte s'Ruthli Gysi
De wette d'Lehrer nümm derby sy

Dr Polo Hofer raucht es Piisli
Mir teike teike teike's iisi

Me bout ne nid me bout ne doch (aha)
Me bout ne nid me bout ne doch

Röfräng:
Aareschtäg

Mir bringe dä de scho no zwäg
Dä ominösi Aareschtäg

Zur Not git's schüsch de nur no eis
Mir trätte n'a e chlini Reis

E'n Usflug Richtig Weschte bissmer
Gseh dass de Gränchner vüu verschissner

Geit und das mir chöi glücklech sy
Au ohni Schtäg es blibt derby

Mir chönnte lang no diskutiere
Und über Chefe lamentiere

Doch haut was gesh mer - jösses nei
Es isch scho schpot - mir müesse hei

Bevor dr Wirt tuet Wysse bringe
Tüe mer no einisch zäme singe

Me bout ne nid me bout ne doch (aha)
Me bout ne nid me bout ne doch